Donald Trump ka reaguar ashpër ndaj ish-shefit të tij të shtabit, John Kelly, duke e quajtur “të degjeneruar” dhe “të ulët”, pas kritikave që ai i bëri, duke e quajtur Trump “fashist”. Kelly, i cili fitoi mbështetje nga Kamala Harris, theksoi se Trump i përshtatet përkufizimit të një fashisti.
Reagimi i Trump erdhi pas një interviste në New York Times, ku Kelly përmendi lavdërimet që Trump kishte bërë për Hitlerin gjatë kohës në Shtëpinë e Bardhë. Në një postim në “Truth Social”, Trump e kritikoi Kelly-n dhe sulmoi Harris-in, duke e akuzuar atë se kishte “humbur mendjen” për shkak të sondazheve negative.
Harris, nga ana e saj, e quajti retorikën e Trump-it “thellësisht shqetësuese”, duke theksuar se ai kërkonte “pushtet të pakontrolluar”. Ndërkohë, ekipi i Trump-it e akuzoi Harrisin për “retorikë të rrezikshme” dhe e lidhën atë me rreziqe për jetën e ish-presidentit.
