Gjykata Themelore në Pejë ka urdhëruar të hënën një muaj paraburgim ndaj dy personave të cilët dyshohet se e kishin sulmuar fizikisht kryetarin e Komunës së Pejës, Gazmend Muhaxheri, në fundjavë.
Muhaxheri dhe një shoqërues i tij u sulmuan nga dy persona mëngjesin e së shtunës në qytetin perëndimor të vendit.
Dy persona u arrestuan ditën e sulmit dhe të hënën gjykata e pranoi kërkesën e prokurorëve që ata të mbahen në paraburgim për 30 ditë, tha për Radion Evropa e Lirë zëdhënësi i Prokurorisë Themelore të Pejës, Shkodran Nikçi.
Ata akuzohen për dy vepra penale, për sulm ndaj personit zyrtar dhe për shkaktim të lëndimeve të lehta trupore.
Pas sulmit, Muhaxheri e kishte publikuar një fotografi në Facebook, duke treguar se ishte mirë me shëndet.
Avokati i Muhaxherit, Dukagjin Kërveshi, tha përmes një postimi në Facebook se kryetari i Pejës beson se arsyeja e sulmit lidhet me punën e tij zyrtare.
Partia e Muhaxherit, Lidhja Demokratike e Kosovës, dënoi ashpër sulmin ndaj kryetarit të Pejës, duke kërkuar që personat e dyshuar të përballen me drejtësinë./REL
