Eksperti i ekonomisë, Zef Preçi, i ftuar në emisionin “5 Pyetjet” me Babaramo, thekson rëndësinë e rritjes së pensioneve në Shqipëri dhe situatën aktuale të standardit të jetesës.
Ai shprehet: Ka një tregues që s’mund ta injorojmë. Në regjimin e kaluar, me atë standard miserabel të nivelit të jetesës, pensioni mesatar ishte 75 për qind e pagesës mesatare. Në vendet e Bashkimit Europian sot, ky përqindje është 60 për qind e pagesës mesatare. Tek ne, është vetëm 1/4, pra 25 për qind. Kjo do të thotë që, nëse do të kishte vullnet politik dhe konsensus, nëse do të kishte vizion për të ardhmen, do të ndërtohej një plan 5 apo 10 vjeçar për të realizuar një rritje prej 2 për qind çdo vit dhe ta parashikonim këtë në buxhet. Pensionistët janë konsumatorë dhe këtu shpenzohen.
