Ministria e Bujqësisë ka përditësuar situatën lidhur me gripin e shpendëve, duke konfirmuar se nuk ka asnjë rast të ri të Influencës Aviare në Shqipëri.
Gjatë periudhës 30 Tetor – 7 Nëntor 2024, janë monitoruar 3935 ferma shpendësh, duke përfshirë analiza dhe kontroll të rreptë në të gjithë vendin, përfshirë Tiranën. Të gjitha rezultatet e testeve kanë dalë negative.
Kontrolli ka përfshirë gjithashtu 209 mostra të dërguara për analizë dhe monitorim të vazhdueshëm të tregtimit të produkteve ushqimore, ku nuk janë konstatuar probleme. Ministria u bën apel qytetarëve të konsumojnë vetëm produkte të certifikuara dhe të mbajnë higjienën e duhur.
Po ashtu, vijon fushata e vaksinimit të kafshëve, me 300 mijë doza vaksina të shpërndara për të luftuar sëmundjet shtazore.
