Shkolla e Magjistraturës, në bashkëpunim me Prezencën e OSBE-së në Shqipëri, ka organizuar një trajnim për prokurorët e SPAK-ut dhe gjyqtarët e Gjykatës së Posaçme Kundër Korrupsionit dhe Krimit të Organizuar, për hetimin dhe gjykimin e veprave penale që lidhen me prokurimin publik.
Trajnimi synon rritjen e kapaciteteve të prokurorëve dhe gjyqtarëve për të trajtuar çështjet që lidhen me korrupsionin e nivelit të lartë dhe krimin e organizuar ndërkombëtar.
Programi përfshinte tema të rëndësishme si risitë ligjore në prokurimet publike, rreziqet që lidhen me procedurat e prokurimit, dhe teknikat speciale të hetimit. Gjatë aktivitetit u diskutuan gjithashtu praktikat më të mira ndërkombëtare dhe raste studimore.
Ky trajnim është pjesë e mbështetjes së vazhdueshme të OSBE-së për forcimin e institucioneve të drejtësisë dhe luftën kundër korrupsionit në Shqipëri.
