Një 54-vjeçar shqiptar ka mbetur i plagosur rëndë në Portugali gjatë një tentative grabitjeje në argjendarinë “Cacho” në Valença. Ngjarja ka ndodhur në Avenida Miguel Dantas, ku pesë persona tentuan të grabisnin dy vëllezërit pronarë të argjendarisë. Grupi i grabitësve ishte nën vëzhgimin e policisë dhe një prokurori të GNR-së, pasi dyshoheshin për krime të tjera në Portugali dhe Spanjë.
Pasi tentuan grabitjen, grabitësit u hasën me ndërhyrjen e policisë dhe prokurorit. Policia hapi zjarr në ajër, ndërsa një nga grabitësit kërcënoi prokurorin me një shufër hekuri. Si pasojë, prokurori e qëlloi atë në bark dhe në kyçin e dorës. I plagosuri pësoi arrest kardiak, por pas manovrave reanimative nga magjistrati, ai rifitoi puls dhe u dërgua në spitalin “Viana do Castelo”.
I plagosuri është identifikuar si një shtetas shqiptar, i cili kishte vizë qëndrimi në Maltë, ndërsa katër të tjerët janë shtetas marokenë dhe italianë. Policia portugeze ka konfirmuar se të dyshuarit ishin të armatosur me armë zjarri gjatë tentativës për grabitje.
