Ngjarja që ndodhi ditën e hënë në afërsi të shkollës Fan Noli ku u vra 14-vjeçari Martin Cani nga një bashkëmoshatar i tij ka tronditur të gjithë opinion publik. Detaje të reja janë zbuluar nga kjo ngjarje e trishtë, ku policia ka gjetur thikën dhe çantën e autorit 14-vjeçar që vrau Martinin.
Autori ka hedhur çantën e shkollës në çatinë e një godine 1-katëshe në rrugën “Fadil Rasha”, pas ATSH-së. Brenda çantës u gjet thika me të cilën kreu krimin dhe librat e shkollës, por nuk ishte telefoni i autorit. Dyshohet se hedhja e çantës në çati është bërë nga vetë autori pasi është larguar menjëherë pas vrasjes së Martinit.
Çanta është gjetur në mënyrë rastësore nga banorë të zonës dhe sapo kanë konstatuar thikën kanë njoftuar policinë. Blutë pritet të verifikojnë kamerat e sigurisë në zonë për të parë nëse ka pasur ose jo bashkëpunëtorë të tjerë për ta ndihmuar për t’u larguar.
Ndërsa ditën e sotme prindërit kanë deklaruar para shkollës Fan Noli që do të bojkotojnë mësimin, si dhe ditën e hënë në orën 17:00 do të zhvillojnë protestë para Ministrisë së Arsimit, ku kërkojnë dorëheqjen e Manastirliut. Ndërkohë autorit të mitur i është caktuar masa e sigurisë “arrest në burg”.
