Pas dy muajsh luftime, ka hyrë në fuqi armëpushimi mes Izraelit dhe Hezbollahut në Liban. Marrëveshja u njoftua nga kryeministri izraelit, Benjamin Netanyahu, pas një propozimi të SHBA-së që mori dritën jeshile. Armëpushimi u aktivizua në orën 03:00 të mëngjesit, sipas orës shqiptare.
Pavarësisht armëpushimit, në orët e para të tij, Izraeli bombardoi disa zona në Bejrut, ndërsa Hezbollahu lëshoi dronë në Tel Aviv. Megjithatë, menjëherë pas shpalljes së armëpushimit, qytetarët e Bejrutit dolën në rrugë për të festuar, duke qëlluar me armë në ajër, ndërkohë që shumë njerëz u rikthyen në shtëpitë e tyre në jug të Libanit, pasi ishin evakuuar gjatë luftimeve.
