Njësitet e Policisë së Kosovës po kryejnë kontrolle në Zubin Potok, pas sulmit terrorist që ndodhi në kanalin e ujit të Ibër-Lepencit. Zëvendësdrejtori i policisë për rajonin e veriut, Veton Elshani, sqaroi se nuk ka pasur bastisje, por kontrolle në zonën e ngjarjes.
Gjatë ditës së shtunë, policia ka realizuar bastisje në disa zona në veri të Kosovës, ku arrestuan tetë persona dhe gjetën një arsenal armësh. Po ashtu, u zbuluan edhe emblema dhe simbole që lidhen me ushtrinë ruse, përfshirë njësitë speciale, forcat ajrore dhe trupat paqeruajtëse. Kjo ka ngritur shqetësime për mundësinë e ndikimit të grupeve pro-ruse në veri të Kosovës.
Në orët e hershme të mëngjesit të sotëm, në fshatin Varagë, pranë Zubin Potokut, është angazhuar një njësit i specializuar i Policisë së Kosovës K-9, i shoqëruar me qen të trajnuar për ndihmën në gjetjen e eksplozivëve. Ky operacion është duke u zhvilluar pas sulmit terrorist të ndodhur dy ditë më parë.
