Nesër në Komisionin e Venecias do të zhvillohet seanca për shqyrtimin e çështjes së Olta Xhaçkës pasi Partia Socialiste i kërkoi mendim për papajtueshmërinë e mandatit, që opozita kërkoi në Kushtetuese që t’i ndërpritet.
Kryetari i grupit të PD-së, Bardhi i kërkoi Elisa Spiropalit, së pari që t’i vendosë në dispozicion draftin paraprak që i ka sjellë Komisioni i Venecias dhe së dyti që opozita të bëhet pjesë e delegacionit në komision.
“Ju duhet të na vini në dispozicion draftin që ka sjellë Komisioni i Venecias për Olta Xhackën. Sikur ia keni vënë në dispozicion deputetëve të maxhorancës, të njëjtën gjë na jepni mundësi edhe ne. Ne nuk do të vijmë me ju për turizëm por opinionet tona do i japim me shkrim. Ju keni bërë delegacion njëpartik në Komisionin e Venecias.
Do të na hiqni të drejtën për të dhënë mendime, do të përjashtoni opozitën nga ky proces. Merrni masa përmes stafit që të jemi pjesë e delegacionit” tha ai. Elisa Spiropali mohoi që Venecia të ketë sjellë draft.
