Komisioni i Venecias miratoi sot, më 6 dhjetor, opinionin mbi kërkesën e Kryetares së Kuvendit, Elisa Spiropali, lidhur me mandatin e deputetes së Partisë Socialiste, Olta Xhaçka. Në seancën e sotme të Komisionit për Demokraci Nëpërmjet Ligjit, u shqyrtua kërkesa e Spiropalit për të marrë një mendim mbi mundësinë që Gjykata Kushtetuese të mund të imponojë një deputeti se si duhet të votojë.
Opinioni i miratuar gjatë mbledhjes do të publikohet në përputhje me rregullat dhe procedurat standarde të Komisionit të Venecias. Sipas njoftimit të Kuvendit, Kryetarja Spiropali do të respektojë ruajtjen e konfidencialitetit të dokumentit deri në publikimin zyrtar të tij, që pritet të ndodhë në javën e ardhshme.
