Qeveria britanike ka dërguar një paralajmërim urgjent për rreth tre milionë njerëz në Uells dhe Anglinë jugperëndimore, pasi stuhia Darragh po i afrohet Mbretërisë së Bashkuar.
Met Office ka lëshuar paralajmërimin e kuq, lloji më serioz, për erë të fortë që mund të arrijë deri në 144 km/h, duke rrezikuar jetën, shkaktuar rrëzim pemësh dhe dëmtuar pasuri. Priten edhe ndërprerje të energjisë elektrike dhe dëmtime të transportit dhe infrastrukturës.
Paralajmërimet janë të vlefshme deri të shtunën, kur pritet që stuhia të godasë me shi të dendur dhe erëra të forta, duke shkaktuar përmbytje dhe shqetësime të mëdha në disa zona.
