Udhëheqësi i opozitës siriane, Hadi al-Bahra ka deklaruar se regjimi i Asadit ka rënë. Sipas agjencisë arabe të lajmeve Al-Arabiya, Bahra ka theksuar se situata në Damask është e sigurt.
Në plaftormën X, Bahra ka thënë se nuk do të ketë hakmarrje dhe shkelje të drejtave të njeriut.
“I them njerëzve tanë të të gjitha sekteve dhe feve, përderisa nuk ngrini armët kundër asnjë qytetari tjetër dhe për sa kohë qëndroni në shtëpitë tuaja, jeni të sigurt. Nuk do të ketë hakmarrjeje dhe asnjë shkelje të të drejtave të njeriut. Dinjiteti i njerëzve do të respektohet dhe dinjiteti i tyre do të ruhet.”, shkruan ai.
Ndërkohë vendodhja e presidentit Bashar-al Assad nuk dihet. Ndërsa vëzhguesi sirian për të Drejtat e Njeriut, me qendër në Britani, tha se Assadi ishte larguar me një avion nga Damasku dhe kishte lënë vendin herët në mëngjesin e 8 dhjetorit.
