Bashar al-Assad dhe familja e tij ndoshta do të qëndrojnë në Moskë të fshehur dhe të izoluar në një bunker sekret. Kur u bë e ditur se presidenti i rrëzuar sirian ishte larguar nga Damasku, duke parë rebelët që po përparonin drejt tij, dhe iku në Moskë shumë supozuan se ai do të vazhdonte të shijonte stilin e tij luksoz së bashku me familjen e tij.
Në fund të fundit, Moska ishte një zgjedhje e përshtatshme për Assadin jo vetëm sepse ai është një aleat i ngushtë i Vladimir Putinit, por edhe sepse thuhet se ka akses në apartamente luksoze në kryeqytetin rus që i përkasin familjes së gjerë.
Megjithatë, në një raport, gazeta britanike Guardian argumenton se nuk ka gjasa që njeriu dikur më i fuqishëm në Siri të banojë në apartamentet luksoze. Në vend të kësaj, ai thuhet se është i izoluar dhe i fshehur për sigurinë e tij, me familjen e tij, por jo pa komoditetin e tyre. Kur Assad vendosi, me nxitjen e rusëve, të largohej nga vendi i tij, ai e dinte se mundësitë e tij të udhëtimit do të ishin gjithmonë të kufizuara.
Por fati i Asadit pasqyron më nga afër atë të ish-presidentit ukrainas Viktor Janukoviç, i cili jeton në një rezidencë shumëmilionëshe në një periferi elitare të Moskës pasi u rrëzua gjatë revolucionit të Maidanit të vitit 2014, shkruan Guardian.
Assad dhe familja e tij nuk kanë gjasa të jetojnë një mënyrë jetese publike dhe të furishme në Moskë. Në vend të kësaj, nën mbikëqyrjen e rreptë të oficerëve rusë të sigurisë, ata ka të ngjarë të mbahen në një pronë të izoluar, të mbrojtur nga sytë e publikut.
