Më 17 dhjetor 2024, në orën 18:01, Shqipëria u godit nga një tërmet me magnitudë 3.8 Rihter, epiqendra e të cilit u regjistrua në Selishtë, në qarkun e Dibrës, me një thellësi prej 15.2 km. Lëkundjet sizmike u ndjenë edhe në zonat përreth, por, sipas Agjencisë Kombëtare të Mbrojtjes Civile, deri tani nuk ka raportime për dëme materiale.
Sipas të dhënave të Qendrës Sizmiologjike Euro Mesdhetare, magnituda e tërmetit është vlerësuar në 4.0 Rihter, duke theksuar se situata është monitoruar me kujdes. Strukturat e mbrojtjes civile të Bashkisë Burrel dhe Qarkut Dibër janë në kontakt me përfaqësuesit lokalë dhe po mbajnë nën vëzhgim situatën për çdo zhvillim të mundshëm.
Postimi i plotë
Sipas të dhënave paraprake të Institutit të Gjeoshkencave, në orën 18:01.37 janë ndjerë lëkundje tërmeti me magnitudë 3.8 të shkallës Rihter.
Epiqendra u regjistrua në Selishtë, në qarkun e Dibrës, me një thellësi prej 15.2 km.
Lëkundjet janë ndjerë edhe në zonat përreth epiqendrës. Sipas komunikimeve paraprake me përfaqësuesit e pushtetit lokal, strukturat e mbrojtjes civile të Bashkisë Burrel dhe
Qarkut Dibër nuk raportohen dëme materiale.
Agjencia Kombëtare e Mbrojtjes Civile mbetet në ndjekje të situatës.
