Ministri gjerman i Mbrojtjes, Boris Pistorius, ka theksuar se forcat ushtarake gjermane duhet të jenë në gatishmëri për luftë për të përballuar kërcënimet e mundshme nga Rusia. Në një intervistë të publikuar nga Politico, ai theksoi se, për të mbuluar nevojat e sigurisë në rritje, buxheti i mbrojtjes duhet të arrijë 80-90 miliardë euro në vit nga viti 2028. Pistorius ka nënvizuar se, në rast të një sulmi nga presidenti rus Vladimir Putin, Gjermania duhet të jetë e gatshme të hyjë në luftë për të mbrojtur aleatët e saj.
Deklaratat e tij vijnë mes një presioni të shtuar ndaj vendeve të NATO-s për të rritur shpenzimet për mbrojtjen, pas shpërthimit të agresionit rus ndaj Ukrainës. Sekretari i Përgjithshëm i NATO-s, Mark Rutte, ka kërkuar që aleatët të shpenzojnë më shumë se 2% të PBB-së për mbrojtjen. Për më tepër, Presidenti i SHBA-së, Donald Trump, ka kërkuar një rritje të këtij shpenzimi në 5% të PBB-së. Pistorius ka sugjeruar gjithashtu një reformë që do të lejojë financimin e nevojshëm për këtë rritje buxhetore, përmes një ndryshimi në politikën fiskale të Gjermanisë.
