Aventura e Rey Manaj te Sivasspor duket se është në fund. Sulmuesi kuqezi ka shpërthyer në disa deklarata, duke theksuar se priste një ofertë nga klubi turk për rinovimin e kontratës, por kjo ofertë nuk ka ardhur. Kështu, Manaj ka paralajmëruar një mundësi largimi gjatë merkatos së janarit.
Mediat turke raportojnë se largimi i tij është i mundshëm, pasi edhe Sivasspor kërkon të përfitojë nga kartoni i tij, pasi kontrata e Manaj është në fuqi vetëm deri në fund të këtij sezoni. Sidoqoftë, oferta për sulmuesin nuk mungojnë, veçanërisht nga klubet turke. Megjithatë, në skenë ka dalë një mundësi interesante nga Bundesliga, pasi klubi i Bochum ka shfaqur interes për të sjellë Manaj në ekip gjatë merkatos së dimrit.
