Ministri i Brendshëm Ervin Hoxha ka njoftuar sot që procesi i përgatitjes për zgjedhjet parlamentare të 11 majit ka hyrë në fazën aktive.
Hoxha konfirmoi se 3,721,116 qytetarë kanë të drejtën e votës, ku 50.5% janë burra dhe 49.5% gra. Ai përmendi disa pika kryesore për garantimin e një procesi të drejtë dhe gjithpërfshirës.
“Verifikimi i listave zgjedhore: Çdo qytetar mund të kontrollojë të dhënat e tij përmes portalit e-Albania ose fizikisht pranë njësive administrative.
Qendrat e votimit: Aktualisht janë 5,050 qendra të miratuara, ndërsa kërkohet vendimmarrje për ato që janë jashtë kufijve të kapacitetit të lejuar.
Dekriminalizimi: Pastrimi i listave nga shtetasit që ligji i përjashton nga e drejta e votës, në bashkëpunim me Ministrinë e Drejtësisë.”, tha Hoxha.
Gjithashtu ai ka ftuar qytetarët që të rinovojnë dokumentet e identifikimit për të shmangur pengesat gjatë regjistrimit.
