Zyrtarët shëndetësorë në Greqi kanë konfirmuar rastin e parë të metapneumovirusit human (HMPV), një virus i lidhur me sëmundjet e frymëmarrjes, te një 71-vjeçar në Selanik.
Vajza e tij ishte kthyer së fundmi nga Kina, duke ngritur shqetësime për mundësinë e transmetimit ndërkombëtar. Pas shfaqjes së simptomave, pacienti kërkoi kujdes mjekësor dhe u shtrua në spital më 3 janar. Testi PCR i bëri të ditur se ishte infektuar me HMPV.
Pacienti, i cili fillimisht ishte në një dhomë të përbashkët me dy të tjerë, është izoluar dhe është nisur gjurmimi i kontakteve.
Megjithëse HMPV zakonisht është më pak i rrezikshëm se viruset e tjera të frymëmarrjes, mund të paraqesë rrezik për grupet vulnerabël, si të moshuarit dhe ata me sëmundje të tjera. Autoritetet po monitorojnë situatën dhe nxisin masat parandaluese.
