Reperi Majk ka ndarë mendimet e tij për tërheqjen nga muzika, duke shpallur se nuk ka ndërmend të vazhdojë me repin në vitet që vijnë. Gjatë një interviste për emisionin “The Elite Way” në ATV, Majk tha se koha dhe përvoja ndryshojnë prioritetet e një personi, dhe ai nuk dëshiron të mbetet i angazhuar me muzikën e repit deri në moshën 40 vjeçare.
“Me kalimin e kohës, ndryshojnë qëllimet dhe prioritetet. Njeriu piqet më shumë dhe mendoj që… nuk kam qejf të jem duke bërë rep as deri në 40 vjeç,” theksoi ai.
Megjithatë, Majk sqaroi se muzika do të mbetet pjesë e jetës së tij, por ai mund të krijojë projekte më sporadike. Ai theksoi se mund të largohet nga industria e muzikës, duke krijuar këngë për kënaqësinë e tij personale, pa qenë më pjesë aktive e estradës siç ka qenë deri tani.
