GJKKO shpalli pafajshëm kryebashkiakun e Devollit, Eduard Duro, për akuzën e shpërdorimit të detyrës.
Ky vendim u shpall pas hetimeve të SPAK, që kërkoi dënimin e tij dhe katër vartësve të tij, Astrit Seferkolli, Gazmend Haxhija, Gazmend Mali dhe Vojsava Bregu, për dhënien e një lejeje për një stacion karburanti në Devoll në kundërshtim me ligjin. Prokuroria kishte kërkuar dënim për secilin prej të pandehurve, duke përfshirë një vit burg për Duron dhe dy të tjerë.
Në hetimet e SPAK u konstatua se Duro, së bashku me zyrtarët e tjerë të Bashkisë Devoll, kishte dhënë autorizimin për shoqërinë “Genci Petrol”, për të tregtuar me pakicë karburant, ndonëse Inspektoriati Kombëtar i Mbrojtjes së Territorit kishte kërkuar prishjen e stacionit të karburantit që në vitin 2019.
