Edvin Kulluri, i ftuar në emisionin “5 Pyetjet” nga Babaramo, ka komentuar arrestimin e Erion Veliajt dhe rolin e SPAK-ut në këtë ngjarje. Sipas Kullurit, “këtu çelësi i suksesit nuk është arrestimi i Veliajt, por dy deklaratat shumë të rëndësishme të organeve të mbikëqyrjes së drejtësisë.”
Ai theksoi se këto deklarata u bënë pasi këto institucione nuk morën pjesë në Komisionin Xhafaj, si dhe ditën e enjtes, kur KLGJ dhe KLP e konfirmuan pavarësinë e drejtësisë. Kulluri theksoi se ky është një sukses i arritur përmes ndërgjegjes së njerëzve.
“Këtu çelësi i suksesit ose ngjarja më e rëndësishme nuk është arrestimi i Veliajt apo mbrojtja që i bën vetes në publik.
Janë dy deklaratat shumë të forta dhe të rëndësishme të organeve të mbikëqyrjes së drejtësisë, në rast kur nuk morën pjesë në Komisionin Xhafaj, dhe e dyta ditën e enjte të KLGJ dhe KLP me reagimin e tyre, që tregojnë pavarësinë e Drejtësisë dhe shkëputjen e saj. Pas 4 vitesh kemi një drejtësi që mund të veprojë si e pavarur dhe të gabojë si e pavarur, pra e pandikuar nga politika”, tha Kulluri.
