Kancelari gjerman, Olaf Scholz, e ka cilësuar si të gabuar dhe të rrezikshme deklaratën e Donald Trump, i cili kishte quajtur presidentin ukrainas, Volodymyr Zelensky, si diktator.
Scholz theksoi se Zelensky është i zgjedhuri demokratik i popullit ukrainas dhe se askush nuk mund të mohojë legjitimitetin e tij.
“Volodymyr Zelensky është kreu i zgjedhur i shtetit të Ukrainës. Zgjedhjet nuk mund të mbahen në mes të luftës dhe është në përputhje me kërkesat e kushtetutës së Ukrainës dhe ligjeve zgjedhore. Askush nuk duhet të pretendojë të kundërtën,” vuri në dukje Scholz.
Ai gjithashtu kujtoi se Rusia, nën udhëheqjen e Putin, është përgjegjëse për nisjen e luftës në Ukrainë, e cila vazhdon prej tre vjetësh.
