Gjermania po zgjedh Bundestagun e ri pasi 59.2 milionë gjermanë janë të ftuar të votojnë në votimet vendimtare. Sondazhet e fundit parashikojnë një epërsi të qartë për Unionin Kristian Demokrat të Friedrich Merz-it përpara rritjes historike të AfD-së së ekstremit të djathtë të Alice Weidel dhe një luftë deri në vdekje për partitë e vogla që konkurrojnë për hyrjen në parlament.
Ndërkohë që procesi zgjedhor është duke u zhvilluar, ankthi po arrin kulmin për të ardhmen e Gjermanisë, e cila pjesërisht do të jetë edhe e ardhmja e Evropës dhe e botës. Kancelari në largim, kreu i SPD-së, Olaf Scholz, si dhe i preferuari i garës, Merz dhe Weidel i AfD-së kanë ushtruar tashmë të drejtën e tyre të votës.
Çfarë thonë mediat gjermane dhe ndërkombëtare
Mediat gjermane Die Welt, referuar ditës së sotme, flet për një klimë polarizimi, për shkak të rritjes së AfD-së, por edhe ndikimit të ndryshimeve të mëdha që pretendohet se po sjell Donald Trump si president i ri i Shteteve të Bashkuara. Në të njëjtën kohë, BILD thekson – duke cituar titujt e mediave kryesore ndërkombëtare – se këto zgjedhje janë shumë më tepër se një ngjarje e thjeshtë kombëtare.
Nga ana tjetër, agjencia franceze e lajmeve thekson se Merz ka premtuar një kthesë të vështirë në të djathtë nëse zgjidhet për të rifituar votuesit nga AfD e ekstremit të djathtë, e cila kërkon të arrijë një rekord elektoral pas një sërë sulmesh vdekjeprurëse që i atribuohen azilkërkuesve dhe kanë ushqyer ndjenjat e pasigurisë dhe islamofobisë.
Nëse ai pason kancelarin e qendrës së majtë Olaf Scholz, siç pritet gjerësisht duke pasur parasysh hendekun e madh në sondazhe, Merz i CDU premtoi një “zë të fortë” në Evropë në një kohë trazirash kaotike. Në fakt, Merz tashmë ka bërë të ditur se nëse zgjidhet kancelar, do të udhëtojë drejt Francës dhe Polonisë, duke marrë masa të menjëhershme në kontinentin e vjetër.
