Deputetja e Partisë Demokratike Andia Ulliri me anë të një postimi në rrjetet sociale u shpreh se Shqipëria ka nevojë për një opozitë të bashkuar dhe të fortë për të larguar qeverinë e korruptuar.
Ulliri thekson se Berisha mbetet lideri historik i Partisë Demokratike, një figurë kyçe në betejat për liri, demokraci dhe sovranitet.
Ajo bën thirrje për bashkim demokratëve në mënyrë që të rrëzojnë qeverinë më të keqe që ka njohur vendi.
“Prandaj, si një demokrate e vjetër dhe deputete e re, u bëj thirrje të gjithëve të mos kontribuojnë në përçarjen e opozitës. Të heqin dorë nga planet për shkatërrimin e PD dhe të punojnë për demokratët e thjeshtë, ata që vuajnë më shumë pasojat e kësaj lufte absurde.
Të pranojnë ftesën e lidershipit të Partisë Demokratike për bashkim, që së bashku të rrëzojmë qeverinë më të keqe që ka njohur vendi.
Nuk ka më kohë për ndarje apo përçarje! Detyra jonë është të fitojmë këto zgjedhje dhe t’i japim fund një regjimi që ka kapur çdo institucion dhe po e mban vendin peng. Shqipëria meriton një qeveri që punon për qytetarët, respekton demokracinë dhe ndërton të ardhmen, jo një që favorizon oligarkët, manipulon zgjedhjet dhe shkatërron shpresën e çdo brezi!
Unë kam reflektuar dhe besoj se çdo demokrat që e do këtë parti dhe vend duhet të bëjë të njëjtën gjë. Të bashkohemi për të fituar, të fitojmë për të ndryshuar!
Është radha jonë të ngrihemi. Është radha jonë të fitojmë. Është radha jonë ta rikthejmë shpresën për Shqipërinë!”, shkruan deputetja Ulliri.
