NATO po kërkon të gjejë zgjidhjet e duhura për të garantuar infrastrukturën që ndodhet në shtratin e Detit Baltik, me rritjen e tensioneve dhe incidenteve në këtë rajon. Shtete si Gjermania, Rusia dhe Letonia lagen nga ujërat e këtij deti, ku ndodhen shumë kabllo dhe tubacione kritike. Korrespodenti i Zërit të Amerikës, Vladislavs Andrejevs sjell më shumë hollësi mbi këto përpjekje.
Gjatë viteve të fundit, në Detin Baltik janë shënuar një sërë incidentesh që përfshijnë dëmtimin e linjave të energjisë dhe komunikimit në shtratin e detit. Dyshimet për rastet janë ngritur ndaj anijeve të lidhura me Kinën dhe Rusinë.
“Në 15 muajt e fundit janë dëmtuar 11 kabllo (për komunikimin), çka ka sjellë edhe ndërprerje. Natyrisht, duhet ta mbajmë parasysh një gjë të tillë. Kemi rritur praninë tonë atje, si dhe praninë e partnerëve tanë të NATO-s”, tha Andris Sprud, ministri i Mbrojtjes së Letonisë.
Nuk ka asnjë provë përfundimtare se dëmtimi është bërë qëllimisht, por disa zyrtarë ushtarakë baltikë janë të shqetësuar se një numër kaq i lartë incidentesh mund të sugjerojnë për sabotim.
“Në tre muajt e fundit ka patur shumë raste incidentesh me spirancat. Sigurisht, gjëra të tilla ndodhin, por nuk ka gjasa të ndodhin kaq shpesh në një zonë të vogël”, thotë komandanti i marinës letoneze, Maris Polencs.
Shkencëtarët po tentojnë të gjejnë se se si të mbrojnë më mirë infrastrukturën strategjike nënujore. Personeli në Qendrën e NATO-s për Kërkimin dhe Eksperimentimin Detar ose C-M-R-E, në Itali, thotë se është arritur përmirësim në gjurmimin e transportit detar në rajon.
“Algoritmet që ka zhvilluar qendra, shpesh duke përdorur inteligjencën artificiale, kanë shërbyer për mbikqyrjen e trafikut të anijeve, sidomos anijeve tregtare.Por po ashtu edhe trafikut civil në vendndodhje të ndryshme. Rezulton se po funksionon shumë mirë”, thotë Eric Pouliquen, drejtor i CMRE -së.
Edhe nëse ngjarjet e fundit janë aksidentale, NATO-ja nuk është e përgatitur për sabotim në Detin Baltik, thotë ish-ministrti letonez i Mbrojtjes Artis Pabriks.
“Ne duhet të parashikojmë dhe të përcaktojmë se cilat anije mund të na kërcënojnë, kjo është një detyrë për shërbimet e zbulimit”, tha zoti Pabriks.
Në fund të janarit, NATO-ja premtoi se do të vendosë fregata, avionë dhe dronë detarë për të ndihmuar në mbrojtjen e infrastrukturës kritike në rajon./VOA
