Kryeministri i ri i Kanadasë Mark Carney tha të martën se qeveria e tij do të mbajë në fuqi tarifat ndaj Shteteve të Bashkuara derisa amerikanët të tregojnë respekt dhe të angazhohen për tregti të lirë.
Carney e quajti vendimin e Trump për tarifat e reja një sulm ndaj punëtorëve, familjeve dhe bizneseve kanadeze.
“Qeveria ime do të sigurojë që përgjigja jonë të ketë ndikim maksimal në SHBA dhe ndikim minimal këtu në Kanada, duke mbështetur punëtorët e prekur,” tha Carney.
“Qeveria ime do të mbajë tarifat tona derisa amerikanët të na tregojnë respekt dhe të bëjnë angazhime të besueshme dhe të drejta për tregtinë e lirë,” shtoi ai.
Trump njoftoi të martën se do të dyfishojë tarifat për çelikun dhe aluminin nga 25% në 50% për Kanadanë, duke përshkallëzuar luftën tregtare me fqinjën e veriut. Ai tha në rrjetet sociale se rritja e tarifave do të hyjë në fuqi të mërkurën.
