Formimi i një aleance ushtarake ndërmjet Kroacisë, Kosovës dhe Shqipërisë ka shkaktuar reagime të forta në Serbi. Presidenti Aleksandar Vuçiç ka pretenduar se ky bashkëpunim shkel marrëveshjen e armëve të vitit 1996, nënshkruar në Firencë ndërmjet Kroacisë dhe ish-Jugosllavisë. Reagimi serb ka qenë i ashpër, duke e konsideruar këtë nismë si një kërcënim për stabilitetin rajonal.
Sipas mediave serbe të afërta me Vuçiçin, Serbia tani po përpiqet të krijojë një aleancë ushtarake me Hungarinë si kundërpërgjigje ndaj aleancës së përmendur. Lajmi është raportuar nga gazeta Kurir, e cila ka thënë se Vuçiç dhe kryeministri hungarez, Viktor Orban, janë në bisedime. Megjithatë, ky informacion ende nuk është konfirmuar zyrtarisht nga asnjë prej liderëve.
