Papa Françesku pritet të dalë nga spitali Gemelli i Romës më 23 mars, pas gati një muaji qëndrim, kanë njoftuar mjekët që e trajtojnë. 88-vjeçari ka qenë në rikuperim nga pneumonia e dyfishtë dhe ka nevojë për të paktën dy muaj pushim në Vatikan pas largimit nga spitali.
Papa është parë vetëm një herë nga publiku që nga momenti i pranimit në spital më 14 shkurt, në një fotografi të publikuar nga Vatikani javën e kaluar, ku ai shihet duke lutur në një kishë spitalore.
Vatikani njoftoi se gjendja e Papës është përmirësuar dhe është stabile, me përmirësime në frymëmarrje dhe lëvizshmëri. Ai nuk përdor më ventilim mekanik për frymëmarrje gjatë natës, por merr oksigjen përmes një tubi të vogël nën hundë. Gjatë ditës, ai po përdor më pak oksigjen me rrjedhje të lartë.
Papa Françesku ka vuajtur nga një numër problemesh shëndetësore gjatë jetës së tij, duke përfshirë heqjen e një pjese të mushkërisë kur ishte 21 vjeç, çka e bën më të prirur ndaj infeksioneve.
