Ministri i Mbrojtjes, Pirro Vengu, ka diskutuar ndryshimet e reja në Ligjin për Statusin e Ushtarakut, duke theksuar rritjen e pagave sipas standardeve të NATO-s për katër vitet e ardhshme.
Sipas projektligjit të paraqitur për konsultim publik, ushtarët do të përfitojnë shpërblime dhe përfitime shëndetësore, ndërsa do të krijohen kushte më të mira për strehim dhe mbështetje pas përfundimit të karrierës.
“Kur vjen puna te rritja e kapaciteteve, modernizimin e forcave dhe industria ushtarake, të gjitha këto kapacitete nuk mund të realizohen me sukses nëse nuk investojmë të kapitali njerëzor.
Ne synojmë të krijojmë instrumente që i bëjnë të rinjtë të rrisin interesin për FA. Përmes ndryshimeve ligjore synojmë mbështetjen financiare për ushtarakët gjatë ushtrimit të detyrës, mbështetjen financiare dhe sociale për familjet e ushtarakëve dhe mbështetje për ushtarakët pas përfundimit të karrierës së tyre.
Krahasuar me 10 vite më parë ne kemi pesëfishuar rekrutimet. Në Akademinë FA kemi 1100 aplikime për 100 të rekrutuar. Jemi në një situatë më të mirë. Gjithashtu pagat janë rritur ndjeshëm. Kishim pagat më të ulëta në Rajon tani kemi pagat më të larta në Rajon dhe synimi është që për 4-vjeçarin e ardhshëm të rrisim pagat sipas standardeve të NATO-s”, nënvizoi Vengu.
Vengu gjithashtu ka theksuar se do të rriten mbështetjet për ushtarët në rezervë dhe ata që dalin në lirim, duke përfshirë një plan për krijimin e shtëpive për oficerët në 12 qarqet e Shqipërisë.
“Për ata që dalin në rezervë dhe lirim ju kërkoj në mënyrë shumë koncize, na jepni kritikat tuaja për ndonjë element që nuk ju pëlqen, por edhe ndonjë element që ju ka pëlqyer edhe e vlerësoni, i pranojmë edhe falënderimet.
Projekt për një shtëpi oficerësh, disa ambiente dinjitoze ku ju mund të keni një program ditor. do ta kemi në 12 qarqet. Sivjet do prodhohet dokumenti i identifikimit ushtarak. Ligji i ri sqaron mënyrën sesi kalohet në akte ligjore që japin benefitet”, shtoi ai.
