Kreu i Partisë Demokratike, Sali Berisha, gjatë një fjalimi të mbajtur në Vlorë, ka akuzuar qeverinë për keqmenaxhim dhe korrupsion, duke vënë në pah kostot e larta të projekteve infrastrukturore si dëshmi të shpërdorimit të fondeve publike. Ai përmendi konkretisht rrugën Levan-Vlorë, të cilën e cilësoi si më të gjerën në Shqipëri me një gjerësi prej 35 metrash, dhe për të cilën, sipas tij, kostoja është rritur nga 1.7 milionë euro për kilometër në 2.4 milionë euro për shkak të ndryshimeve të bëra në projekt.
Berisha po ashtu theksoi se krahasuar me rrugën e Levan-Vlorë, rruga e Arbrit, më e ngushtë, ka shkuar deri në 11 milionë euro për kilometër. Ai akuzoi qeverinë për abuzim me fondet dhe për shpërdorimin e parave që duhej të shkonin për mirëqenien e qytetarëve, veçanërisht pensionistëve, të cilët sipas tij, po jetojnë në kushte të vështira.
Në fjalën e tij, Berisha u shpreh: “Rruga Levan-Vlorë ishte planifikuar të ndërtohej me 42 milionë euro, por pas ndryshimeve në projekt, ajo përfundoi me një kosto prej 2.4 milionë euro për kilometër. Kjo është një shenjë e keqmenaxhimit dhe abuzimit me paratë publike.” Ai gjithashtu e vuri theksin tek faktin se, përkundër pasurisë që ka Vlora dhe Shqipëria, shumë qytetarë po jetojnë në varfëri, ndërsa paratë që duhej të shkonin për përmirësimin e kushteve të jetesës janë shpenzuar për interesa klienteliste.
“Ky është një abuzim që i bëhet qytetarëve të thjeshtë, të cilët po vuajnë për shkak të keqpërdorimit të fondeve,” tha Berisha, duke theksuar se shumë pensionistë po përballen me varfëri ekstreme dhe nuk mund të përballojnë nevojat e përditshme.
Ai mbylli fjalimin e tij duke i bërë thirrje qytetarëve të Vlorës dhe të Shqipërisë që të bëjnë zgjedhjen e duhur më 11 maj, duke votuar për dinjitetin dhe mirëqenien e tyre. “Të votosh anën e drejtë të historisë do të thotë të votosh për dinjitetin dhe të drejtat e qytetarëve. Unë garantoj se pasuritë e shqiptarëve do t’u kthehen atyre dhe vetëm atyre,” përfundoi Berisha.
