Kryeministri Edi Rama, gjatë rubrikës “Sy m’sy” në Facebook, iu përgjigj pyetjeve të qytetarëve dhe bëri një thirrje të veçantë për ata që nuk mbështesin Partinë Socialiste, duke i inkurajuar të mos shkojnë të votojnë. Ai reagoi pas një komenti nga një ndjekës që sugjeroi largimin e tij dhe hapjen e mundësisë për të rinjtë.
Rama theksoi se ky është një vendim që e merr populli.
“Këtë e vendos populli që nuk ka mendjen tënde. Është një gjykatës shumë i madh, suprem sovran. Dakord,” u shpreh ai, duke iu referuar procesit demokratik.
Për më tepër, Rama e përdori mundësinë për të ironizuar opozitën, duke komentuar mbi “kënetën”, që sipas tij, është një situatë jo e favorshme për politikanët dhe votuesit.
Ai shtoi: “Edhe ty të bëj thirrje që të mos votosh, meqë e ke mendjen në kënetë dhe meqë nuk ke asnjë lloj tundimi se mbase voton për mua dhe për PS, mos voto fare. Mos u hidh në kënetë, sepse është diçka që nuk është higjienike nga pikëpamje politike.”
