Lideri i serbëve të Bosnjës, Millorad Dodik, deklaroi se do të kërkojë nga Rusia një formë mbështetjeje për sigurinë e Republikës Sërpska, pas katër takimeve që zhvilloi me presidentin rus Vladimir Putin gjatë dy ditëve të fundit në Moskë.
Në një intervistë për mediat e entitetit serb të Bosnjës, Dodik tha se është siguruar nga Putin se do të mbeten në kontakt për çështjet e bashkëpunimit të ndërsjellë. Ai theksoi se synon të kërkojë garanci politike dhe territoriale nga Rusia, duke u mbështetur në rolin e saj si një nga garantueset e Marrëveshjes së Dejtonit.
Dodik gjithashtu kritikoi vendet perëndimore, duke akuzuar Francën për përpjekje për ta “degraduar” këtë marrëveshje. Ai vazhdon të përballet me një fletarrest kombëtar nga Gjykata e Bosnje e Hercegovinës për shkelje të rendit kushtetues, por deri më tani ka shmangur arrestimin.
Ndërkohë, përfaqësuesi i Lartë në Bosnje, Christian Schmidt, ka paralajmëruar për përkeqësimin e situatës politike dhe rrezikun e “shkëputjes de facto” të Republikës Sërpska nga Bosnja.
Vizita e Dodikut në Moskë ndodhi në kuadër të festimeve të Ditës së Fitores, ku morën pjesë edhe liderë të tjerë, përfshirë presidentin serb Aleksandar Vuçiq dhe kryeministrin sllovak Robert Fico. Parada u kritikua nga Perëndimi si pjesë e propagandës ruse lidhur me luftën në Ukrainë.
