Java e fundit e majit po kalon në heshtje në ambientet e Milanit, por pas skenave duket se po përgatitet një tjetër verë me lëvizje të mëdha në klubin kuqezi. Pas largimit të mundshëm të Serxho Konseisaos nga lista e preferencave për pankinën e “Djallit”, ka dalë në skenë një tjetër emër me peshë në futbollin ndërkombëtar: Roberto Mançini.
Sipas raportimeve të gazetarit Alessandro Jacobone, përmes një postimi në rrjetin social “X”, Mançini është një nga kandidaturat që po shqyrtohen seriozisht nga drejtuesit e Milanit. Emri i ish-trajnerit të Italisë, me të cilin “Azzurrët” fituan Kampionatin Evropian në vitin 2021, është propozuar nga super-agjenti me origjinë shqiptare, Fali Ramadani.
Ramadani, një nga figurat më me ndikim në botën e agjentëve të futbollit, është bashkëthemelues i agjencisë LIAN Sports Group – një nga më të mëdhatë në Evropë. Ai ka qenë ndërmjetës në transferime të rëndësishme si ato të Kalidou Koulibaly te Chelsea, Luka Jović te Real Madrid dhe së fundmi Andre Onana te Manchester United.
Për Milanin, prioritet është gjetja e një trajneri me profil fitues dhe përvojë në nivelet më të larta. Roberto Mançini e plotëson këtë profil – me eksperiencën e tij në Serie A, ekipin kombëtar dhe klube të mëdha si Inter e Manchester City, ai shihet si një opsion që mund t’i japë stabilitet dhe drejtim të qartë projektit kuqezi.
Megjithatë, mbetet për t’u parë nëse idetë e Mançinit përputhen me vizionin aktual të klubit dhe nëse bisedimet do të konkretizohen. Deri atëherë, ai është një ndër emrat që mbeten në qarkullim për pankinën e Milanit, në një listë që vazhdon të jetë e hapur për zhvillime të reja.
