Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, ka nisur një vizitë në rajon, duke mbërritur së pari në Beograd. Nesër, ajo pritet të vizitojë Prishtinën, ku do të zhvillojë takime me krerët e partive politike dhe përfaqësues të organizatave të shoqërisë civile.
Në një njoftim të publikuar nga BE, thuhet se Kallas do të mbajë një konferencë për shtyp më 22 maj në Shtëpinë e Evropës në Prishtinë, që do të transmetohet drejtpërdrejt. Përveç kësaj, ajo do të vizitojë Misionin e Bashkimit Evropian për Sundimin e Ligjit në Kosovë (EULEX) dhe do të takohet me komandantin e KFOR-it, Enriko Barduani.
Agjenda e Kallas në Kosovë përfshin takime me liderët politikë në Zyrën e BE-së në Prishtinë, por nuk parashikohet ndonjë takim me zyrtarë të institucioneve të Kosovës. Kjo vjen pas një takimi që Kallas pati me Presidenten Vjosa Osmani në Tiranë gjatë Samitit të Komunitetit Politik Evropian, ku u njoftua se ajo do të jetë e pranishme në Zvicër gjatë vizitës në Prishtinë dhe, për këtë arsye, nuk do të takojë Presidenten Osmani. Megjithatë, Kallas do të takojë Kryeministrin Albin Kurti, lider i partisë Vetëvendosje.
Vizita e Kajas Kallas është pjesë e angazhimit të Bashkimit Evropian për të mbështetur proceset e integrimit të Kosovës dhe për të thelluar bashkëpunimin me shtetet e rajonit.
