Presidenti i Turqisë, Rexhep Tajip Erdogan ka deklaruar se nuk ka ndërmend të kandidojë përsëri.
Erdogan u rizgjodh president për herë të tretë në vitin 2023 dhe sipas mandatit aktual ai do të qëndrojë në detyrë deri në vitin 2028. Ai ka thënë se ky është mandati i tij i fundit por duhet që të ndryshohet Kushtetuta.
“Nuk kam asnjë qëllim të kandidoj sërish. Qëllimi ynë i vetëm është të rrisim reputacionin e vendit tonë. Turqia po ndryshon, bota po ndryshon. A mendoni se në një botë kaq dinamike mund të ecim përpara me një Kushtetutë të krijuar në kohën e grusht shtetit, që ende mban erën e mentalitetit të puçistëve? Turqia nuk mund të ecë më me një Kushtetutë të tillë. Na duhet një Kushtetutë e propozuar nga civilët, jo nga puçistët”, ka deklaruar Erdogan, sipas agjencisë shtetërore “Anadolu”.
