Gjykata e Posaçme ka dënuar avokatin Radovan Çela me 4 vite burg, lidhur me dosjen “Toyota Yaris”, por pas gjykimit të shkurtuar dënimi i tij është ulur në 2.8 vite. Çela, i cili ka qenë përfaqësues ligjor i Alfred dhe Elvis Vladit, të dyshuar për trafikimin e 3.4 milionë eurove në portin e Durrësit, akuzohet për korrupsion dhe ndikim të paligjshëm.
Në këtë dosje janë përfshirë edhe Aurel Zarka, ish-Kryeprokuror i Vlorës, dhe disa persona të tjerë, për të cilët rëndojnë akuzat për ryshfet dhe përpjekje për të ndikuar tek funksionarët e drejtësisë. Hetimi ka zbuluar gjithashtu komunikime të koduara mes të pandehurve, të cilat janë përdorur për të favorizuar të pandehurit në çështjen e sekuestrimit të parave.
