Një tjetër humbje tragjike është regjistruar në Rripin e Gazës, ku Mohammad Mustafa Yassin, vetëm 4 vjeç, ndërroi jetë nga uria në Spitalin Arab Baptist al-Ahli. Sipas burimeve mjekësore, vogëlushi është viktima e 58-të që humb jetën si pasojë e kequshqyerjes ekstreme gjatë 80 ditëve të fundit të rrethimit izraelit.
Situata humanitare në Gaza po përshkallëzohet çdo ditë. Mbi 240 persona – shumica fëmijë dhe të moshuar – kanë ndërruar jetë për shkak të mungesës së ushqimit, ujit të pijshëm dhe medikamenteve, ndërsa fluksi i ndihmave humanitare është kufizuar në nivele alarmante. Deri në mars, në Gaza hynin mesatarisht 600 kamionë ndihmash në ditë. Sot, kjo shifër është reduktuar në vetëm 119 gjatë gjithë javës së fundit.
Philippe Lazzarini, Komisioneri i Lartë i UNRWA-së, e cilësoi situatën si një “katastrofë të krijuar nga dora e njeriut” dhe akuzoi përdorimin e urisë si një armë lufte. “Të gjithë në Gaza janë të uritur. Kjo nuk është më vetëm një krizë, por një akt i qëllimshëm ndaj civilëve,” deklaroi ai.
Reagimi ndërkombëtar po intensifikohet. Më shumë se 80 shtete kanë lëshuar një deklaratë të përbashkët duke kërkuar ndërhyrje urgjente për të shmangur kolapsin total humanitar. Edhe aleatë të ngushtë të Izraelit, si Britania, Kanadaja dhe Franca, po shtojnë presionin diplomatik për të garantuar hyrjen e ndihmave jetike.
Në sfondin e kësaj tragjedie, historia e vogëlushit Mohammad Yassin është kthyer në një simbol të vuajtjes së pafajshme të një popullsie të bllokuar, që po lufton për mbijetesë në mes të një krize që nuk njeh mëshirë.
