Mijëra qytetarë bullgarë dolën në rrugë këtë fundjavë në disa qytete të vendit, përfshirë kryeqytetin Sofje, për të protestuar kundër hyrjes së Bullgarisë në eurozonë. Protestat, të organizuara nga partia ultranacionaliste “Ringjallja” dhe disa organizata joqeveritare, kërkuan ruajtjen e monedhës kombëtare levis bullgar dhe organizimin e një referendumi për këtë çështje.
Protestuesit shprehën shqetësimin se anëtarësimi në zonën euro do të çonte në rritje të çmimeve dhe humbje të sovranitetit ekonomik të vendit.
“Kërkojmë një referendum për të mbrojtur levin bullgar dhe lirinë ekonomike të vendit,” deklaroi lideri i partisë “Ringjallja”, Kostadin Kostadinov, duke theksuar se “vullneti i popullit është kundër euros.”
Ndërkohë, edhe presidenti bullgar, Rumen Radev, ka paraqitur së fundmi një kërkesë në Parlament për zhvillimin e një referendumi mbi miratimin e euros si monedhë zyrtare.
Megjithatë, sipas Bankës Qendrore Evropiane, Bullgaria nuk i plotëson ende kushtet për t’u bashkuar me eurozonën, për shkak të nivelit të lartë të inflacionit.
Aktualisht, Bullgaria është një nga shtatë vendet anëtare të Bashkimit Evropian që nuk e përdorin euron si monedhë zyrtare, përkrah Republikës Çeke, Danimarkës, Hungarisë, Polonisë, Rumanisë dhe Suedisë. Të gjitha këto vende përveç Danimarkës që ka një klauzolë përjashtimi janë të detyruara të adoptojnë euron pasi të përmbushin kriteret e përcaktuara.
