Gjykata e Lartë ka refuzuar rekursin e ish-drejtorit të ARRSH, Evis Berberi, lidhur me masën e sigurisë që i është caktuar. Vendimi u mor sot në dhomë këshillimi nga gjyqtarët Ilir Panda, Medi Bici dhe Albana Boksi.
Berberi ndodhet në paraburgim që prej 16 marsit të këtij viti, ndërsa kërkesat e tij për zbutjen e masës janë rrëzuar më parë nga Gjykata e Posaçme Kundër Korrupsionit dhe Krimit të Organizuar, Apeli si dhe Gjykata e Lartë.
Përveç tij, në pranga janë edhe Valter Begaj dhe Ervis Lami. Ky i fundit u lirua nga shkalla e parë, por u rikthye në paraburgim pas apelimit të prokurorisë.
Hetimet zbuluan se gjatë kohës që Berberi drejtonte ARRSH dhe Agjencinë për Eficencën e Energjisë, ai favorizoi kompaninë e ortakut të tij, Valter Begaj, duke i dhënë gjashtë tenderë, ndërsa fitimet përfundonin tek kompania që Begaj zotëronte në mënyrë indirekte.
