Në Tiranë, një 15-vjeçar u plagos pasditen e së dielës brenda picerisë “Fantazia” në zonën e Ali Demit, ku ai punonte si kamarier. Autori, motoristi i picerisë Aldo Neziri, ka përdorur një armë të fshehur në formën e një stilolapsi për të qëlluar adoleshentin. Pas ngjarjes, ai hodhi armën në zonën e Laprakës në përpjekje për të fshirë provat.
Neziri ka deklaruar se plagosja ka ndodhur aksidentalisht, por ka dyshime se kjo nuk ka qenë një ngjarje e rastësishme. Sipas burimeve, tre punonjës të tjerë të picerisë janë akuzuar për përfshirje, pasi kanë pastruar vendin e ngjarjes dhe kanë hequr provat, përfshirë pamjet nga kamerat e sigurisë. Policia u njoftua për ngjarjen vetëm pasi 15-vjeçari ishte dërguar në spital.
