Kryeministri i Izraelit, Benjamin Netanyahu, deklaroi se Irani ka prodhuar uranium të pasuruar në sasi të mjaftueshme për të ndërtuar nëntë armë bërthamore. Nga ana tjetër, Teherani mohon çdo qëllim për ndërtimin e një bombe.
Sipas raportit të fundit të Agjencisë Ndërkombëtare për Energjinë Bërthamore (IAEA), Irani zotëron sasi uraniumi të pasuruar deri në 60%, nivel ky që nuk është ende i mjaftueshëm për armë, por mund të pasurohet deri në 90%, duke mundësuar prodhimin e nëntë armëve bërthamore.
Netanyahu paralajmëroi se Irani mund të prodhojë një armë bërthamore brenda disa muajsh deri në një vit dhe e cilësoi këtë si një kërcënim të madh për sigurinë e Izraelit.
Pas tërheqjes së SHBA-së nga marrëveshja bërthamore në vitin 2018, Irani ka zgjeruar në mënyrë të ndjeshme programin e pasurimit të uraniumit, duke arritur tani një sasi dhe pastërti shumë më të lartë se më parë.
IAEA ka akuzuar prej kohësh Iranin për shkelje të marrëveshjeve për mospërhapjen e armëve bërthamore, dhe së fundmi bordi i saj miratoi një rezolutë që konfirmon këto shkelje.
Irani nga ana e tij ka premtuar se do të përshkallëzojë aktivitetet bërthamore si përgjigje ndaj presionit ndërkombëtar.
