Forcat Ajrore të Izraelit kanë ndërmarrë një operacion ajror ndaj një objekti në qytetin Mashhad të Iranit, një nga qendrat më të mëdha urbane në verilindje të vendit. Sipas njoftimit të Forcave të Mbrojtjes izraelite (IDF), objektivi ishte një avion furnizimi iranian, i pozicionuar në aeroportin e qytetit.
Mashhadi ndodhet rreth 2.300 kilometra larg Izraelit, duke e bërë këtë goditje një nga më të gjatat që ka realizuar Tel Avivi që nga intensifikimi i veprimeve ushtarake në rajon.
Ndërkohë që autoritetet iraniane nuk kanë raportuar për dëme të konsiderueshme në infrastrukturën e aeroportit, burime lokale kanë përmendur një shpërthim në lindje të qytetit, pa konfirmime zyrtare mbi shkallën e dëmeve.
IDF e ka përshkruar sulmin si pjesë të një strategjie më të gjerë për të rritur kontrollin ajror mbi Iranin. “Po punojmë për të siguruar epërsi ajrore në të gjithë territorin iranian,” thuhet në deklaratën e tyre.
