Kryetarja e Parlamentit të Shqipërisë, Elisa Spiropali nga Samiti Parlamentar i NATO-s në Bruksel e vendosi theksin te zhvillimet e fundit në Lindjen e Mesme, luftën në Ukrainë dhe pozicionin e Shqipërisë në Aleancë duke i bërë thirrje Iranit të ndalë aktivitetin bërthamor sipas ligjeve ndërkombëtare.
“Sikur bota nuk kishte parë mjaftueshëm trazira gjatë viteve të fundit, përshkallëzimi ushtarak së fundmi midis Iranit dhe Izraelit vetëm e rëndon më shumë një botë të bazuar në rregulla, që tashmë është nën trysni të madhe.
I bëjmë thirrje Iranit të ndërpresë aktivitetet e tij bërthamore dhe të raketave balistike dhe të veprojë në përputhje me detyrimet e tij sipas ligjit ndërkombëtar, përfshirë Traktatin për Mospërhapjen e Armëve Bërthamore” tha Elisa Spiropali.
