Valë të reja të nxehti priten në vendet evropiane, veçanërisht në Itali, ku rreth 20 qytete të mëdha u vunë në gatishmëri këtë fundjavë, dhe në Francë, e cila po përballet me rrezikun e zjarreve në juglindje.
Ministria e shëndetësisë e Italisë ka vënë Romën në alarm “të kuq” për shkak të një niveli të nxehtësisë. Në vitin 2021, Italia theu rekordin e temperaturës për Evropën kontinentale, duke arritur 48.8 gradë Celsius, sipas Organizatës Botërore Meteorologjike.
Në Francë, katër rajone në rajonin e Mesdheut (Bouches-du-Rhône, Gard, Hérault dhe Pyrénées-Orientales) u vendosën në një alarm portokalli për valë të nxehti sot në orën 13:00, njoftoi Shërbimi Meteorologjik i vendit, me “faktorin rëndues” që janë temperaturat sipërfaqësore të Detit Mesdhe, të cilat mund të “ndikojnë në temperaturat minimale, duke i bërë netët më mbytëse”.
Temperaturat priten të variojnë nga 35 deri në 38 gradë Celsius, ndërsa lokalisht 39 gradë Celsius, kryesisht në brendësi të vendit.
Nxehtësia mund të përkeqësohet më tej dhe veçanërisht të përhapet në pjesën tjetër të vendit, shpjegon Météo-France. Nesër, temperaturat e mëngjesit do të variojnë midis 10 dhe 26 gradë Celsius, pranë Mesdheut, përpara se të arrijnë 34 deri në 38 gradë Celsius, lokalisht 40 gradë Celsius.
Qyteti i dytë më i madh i Francës, Marseja, njoftoi se hyrja në pishinat komunale do të jetë falas deri në fund të ngjarjeve ekstreme të motit.
Në Provence, i cili është rajoni më i ekspozuar ndaj rrezikut të zjarreve pyjore në Francën metropolitane, 14 zona pyjore nga një total prej 26 janë mbyllur, me një “ndalim të rreptë” për këdo që hyn në to.
Kjo valë e të nxehtit po godet edhe Spanjën jugore, ku temperaturat do të kalojnë 40 gradë Celsius nesër, të shtunën.
Spanja po përgatitet gjithashtu të përjetojë valën e parë të të nxehtit të verës, e cila do të fillojë nesër dhe do ta çojë deri në 42 gradë Celsius në pjesën jugore të vendit.
Ditët më të këqija do të jenë e diela dhe e hëna, kur termometrat do të tregojnë mbi 40 gradë Celsius në pjesët jugore, qendrore dhe lindore të vendit, paralajmëroi shërbimi meteorologjik i vendit Aemet.
Në Portugali, dy të tretat e vendit do të vendosen në alarm portokalli të dielën, me 42 gradë Celsius të parashikuara në Lisbonë dhe një rrezik maksimal për zjarre. Ballkani po përballet gjithashtu me valën e parë të të nxehtit të vitit.
