Presidentja e Komisionit Evropian, Ursula von der Leyen, do të përballet me një votë mosbesimi në Parlamentin Evropian të enjten e ardhshme, më 10 korrik. Kjo ndodh për herë të parë që nga viti 2014.
Iniciativa për votën e mosbesimit është ndërmarrë nga eurodeputeti rumun i djathtë, Gheorghe Piperea, si reagim ndaj mesazheve të fshehta të shkëmbyera midis Von der Leyen dhe CEO-së së Pfizer, Albert Bourla, lidhur me blerjen e vaksinave kundër COVID-19 nga Bashkimi Evropian.
Sipas raportimit të Politico, kjo lëvizje vlerësohet më shumë si simbolike, pasi shumica e grupeve politike në Parlamentin Evropian kanë deklaruar tashmë se do ta kundërshtojnë votën e mosbesimit.
Von der Leyen do duhet të paraqitet në një debat zyrtar ditën e hënë, më 8 korrik, tre ditë para votimit, për të dhënë llogari mbi veprimet e Komisionit Evropian.
