Presidentja e Kosovës, Vjosa Osmani, ka reaguar pas vdekjes së 27-vjeçarit Agon Zejnullahu, i cili dyshohet të ketë humbur jetën gjatë një operacioni policor. Ajo e ka cilësuar ngjarjen si “shumë të rëndë dhe tronditëse” dhe ka kërkuar një hetim të menjëhershëm, të pavarur dhe profesional.
“Transparenca e plotë dhe përgjegjësia institucionale janë të domosdoshme. Drejtësia duhet të jetë e pakompromis. Çdo zyrtar që ka shkelur ligjin duhet të mbajë përgjegjësi, askush nuk është mbi ligjin,” tha Osmani në reagimin e saj zyrtar.
Ajo theksoi se kërkesat për llogaridhënie nga qytetarët janë të drejta dhe duhet të marrin përgjigje të qarta nga institucionet përgjegjëse.
