E mërkura pritet të shënojë kulmin e valës së të nxehtit afrikan që ka përfshirë territorin shqiptar, me temperatura që në disa zona do të arrijnë deri në 41°C.
Sipas të dhënave meteorologjike, vendi do të dominohet nga moti i kthjellët dhe i nxehtë gjatë gjithë ditës. Vetëm në orët e pasdites, parashikohen kalime të lehta vranësirash në zonat malore përgjatë shtrirjes lindore të vendit.
Temperaturat do të jenë tepër të larta në të dyja ekstremet e ditës. Vlera më e ulët e mëngjesit pritet të regjistrohet në qytetin e Peshkopisë me 12°C, ndërsa maksimumi do të kapë vlerën 41°C në qarqet Elbasan, Shkodër dhe Berat – ky i fundit vetëm në zona të izoluara.
Era do të fryjë mesatare, me një shpejtësi që herë pas here pritet të kapë mbi 30 km/h nga drejtimi Perëndimor-Veriperëndimor. Kjo do të sjellë dallgëzim të lehtë mbi 1 ballë përgjatë brigjeve detare.
Autoritetet bëjnë thirrje për kujdes të shtuar, veçanërisht gjatë orëve të mesditës, për të shmangur ekspozimin e zgjatur në diell dhe për të konsumuar lëngje në mënyrë të vazhdueshme.
