Apeli i Gjykatës së Posaçme ka vendosur uljen e dënimit për Pashk Sylën, i kapur në trafik droge nga Shqipëria në Greqi.
Pashk Syla kërkoi ndryshimin e vendimit me burg. Gjykata e rrëzoi vendimin dhe uli dënimin me 1/3, duke e dënuar përfundimisht me 4 vjet e 8 muaj burg.
Vendimi:
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Igerta Hysi (kryesuese), Florjan Kalaja (anëtar) dhe Tereza Merkaj (anëtare), më datë 22.07.2025, shpalli vendimin lidhur me çështjen e regjistruar me nr. 41 akti, datë 08.05.2025 regjistrimi, mbi ankimin e paraqitur nga i pandehuri P.S., ndaj vendimit nr. 11, datë 03.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:
- Lënien në fuqi të vendimit nr. 11, datë 03.02.2025 të Gjykatës së Posaçme Shkallës së Parë për Korrupsionin dhe Krimin e Organizuar për të pandehurin P.S., me këtë ndryshim:
• Në zbatim të nenit 406 pika 1 të Kodit të Procedurës Penale, uljen e dënimit me 1/3 dhe dënimin përfundimisht të të pandehurit Pashk Syla me 4 (katër) vjet e 8 (tetë) muaj burgim. - Shpenzimet gjyqësore të gjykimit në apel, i ngarkohen të pandehurit.
- Kundër vendimit mund të bëhet rekurs në Gjykatën e Lartë, brenda 45 (dyzet e pesë) ditëve, duke filluar ky afat nga e nesërmja e njoftimit të tij.
U shpall në Tiranë, më datë 22.07.2025.
