Leli Kaja, drejtori i ndërmarrjes “ECO-ELB Sh.A.” në Elbasan, vazhdon të kryejë detyrën dhe merr pjesë në mbledhje zyrtare, edhe pse është shpallur në kërkim nga Prokuroria për një aferë abuzimi me fondet publike në vlerë 8 milionë euro dhe zjarrvënie të qëllimshme në landfill.
Pavarësisht urdhrit zyrtar për arrestim, Kaja nuk është ndaluar dhe gjatë mbledhjes së fundit të Këshillit Bashkiak të Elbasanit, të pranishme ishin edhe forcat e Policisë, të cilat nuk ndërhynë.
Ngjarja ngre shqetësime për funksionimin e shtetit të së drejtës, pasi as autoritetet vendore dhe as Prokuroria nuk kanë marrë masa për pezullimin e tij, ndonëse dosja përfshin shifra të mëdha dhe dyshohet për lidhje me krimin e organizuar.
Kaja ka mbajtur më parë poste të rëndësishme në bashki dhe konsiderohet i afërt me kryetarin e Bashkisë së Elbasanit, Gledjan Llatja, i cili nuk ka ndërmarrë asnjë hap për shkarkimin e tij.
Për më tepër, drejtori është përfshirë edhe në ndërtimin pa leje të një objekti të madh në pronë publike pranë Policisë së Elbasanit, ndërsa institucionet heshtin ndaj këtyre shkeljeve.
Ky rast tregon një mungesë serioze përgjegjshmërie dhe kërkon ndërhyrje të menjëhershme nga institucionet qendrore dhe drejtësia e specializuar për të rivendosur besimin tek ligji dhe drejtësia.
